anthing

39. þingi AN lokið

Fri, 25 Sep 2026 11:34:15 GMT

70 fulltrúar, frá níu af ellefu stéttarfélögum á Norðurlandi sátu 39. þing Alþýðusambands Norðurlands sem fram fór á Illugastöðum í Fnjóskadal 24. og 25. september 2026. Á þinginu var samhljóða samþykkt ályktun um byggða- og atvinnumál .

70 fulltrúar, frá níu af ellefu stéttarfélögum á Norðurlandi sátu 39. þing Alþýðusambands Norðurlands sem fram fór á Illugastöðum í Fnjóskadal 24. og 25. september 2026. Á þinginu var samhljóða samþykkt ályktun um byggða- og atvinnumál .

Fjölbreytt og góð erindi
Fjölmargir gestir mættu á þingið í eigin formi eða rafrænu og voru með fjölbreytt erindi. Hjördís Þóra Sigurþórsdóttir, 1. varaforseti ASÍ, flutti ávarp í stað forseta ASÍ sem komst ekki á þingið eins og til stóð. Magnús Smári Smárason, verkefnastjóri í gervigreind hjá Háskólanum á Akureyri var með fyrirlestur sem bar nefnið Gervigreind á mannamáli. Róbert Farestveit, sviðsstjóri Hagfræði- og greiningasviðs ASÍ, fór yfir stöðuna og horfur í samfélaginu. Björn Gíslason, verkefnisstjóri atvinnuuppbyggingar á Bakka, fór yfir uppbygginguna á atvinnusvæðinu, í fortíð, nútíð og framtíð. Einar Georgsson, framkvæmdastjóri Brákar, var með kynningu á leigufélögunum Bríet og Brák sem leiguhúsnæði framtíðarinnar. Iða Marsibil Jónsdóttir, framkvæmdastjóri Bríetar, forfallaðist og því fjallaði Einar um bæði félögin. Trausti Jörundarson, formaður Sjómannafélags Eyjafjarðar, fjallaði um ASÍ sem samnefnara aðildarfélaga og urðu góðar umræður undir því erindi.

Tryggvi Jóhannsson, formaður Einingar-Iðju og formaður orlofsbyggðarinnar á Illugastöðum, hóf seinni daginn þegar hann fjallaði um hugmyndir að stækkun orlofsbyggðarinnar og urðu góðar umræður undir þeim lið og vel tekið í erindið. Áður en kosningar fóru fram var farið yfir og samþykktir ársreikningar AN fyrir árin 2024 og 2025 sem og fjárhagsáætlun fyrir árin 2026 og 2027. Einnig var samþykkt breyting á 8. gr. laga AN þannig að fjöldi fulltrúa á þing AN fækki og verði 70 í stað 100. Með uppbótarfulltrúum, þar sem öll félög fá að lágmarki tvo fulltrúa á hvert þing, verða fulltrúar í raun 76.

Ný stjórn AN

Á myndinn i sem fylgir fréttinni má sjá nýja stjórn AN. F.v. Eydís, Trausti, Álfheiður, Atli og Ingimar. Á myndina vantar Nönnu sem átti ekki heimangengt.

Tillaga kjörnefndar um nýja stjórn Alþýðusambands Norðurlands árin 2026-2028 var samþykkt samhljóða.

Trausti Jörundarson, formaður Sjómannafélags Eyjafjarðar, var kjörinn nýr formaður AN til næstu tveggja ára. Með honum í stjórn eru Atli Hjartarsson, frá Öldunni stéttarfélagi, sem er varaformaður stjórnar, og Ingimar Atli Knútsson, frá Framsýn sem er ritari stjórnar.

Varamenn í stjórn eru Álfheiður Ösp Haraldsdóttir, frá Samstöðu, Eydís Bjarnadóttir, frá FVSA, og Nanna Steina Höskuldsdóttir, frá Framsýn.

Einnig voru kjörnir tveir skoðunarmenn reikninga til tveggja ára; Rósfríð Kristín Áslaugsdóttir, frá Einingu-Iðju, og Stefanía Árdís Árnadóttir, frá FVSA. Arna Dröfn Björnsdóttir, frá Öldunni stéttarfélagi, var kjörin varamaður þeirra.

Til baka

39. þing AN - Ályktun um byggða- og atvinnumál

Fri, 25 Sep 2026 10:17:53 GMT

Ályktun um byggða- og atvinnumál

Á 39. þingi AN var samþykkt samhljóða eftirfarandi ályktun um byggða- og atvinnumál.

Ályktun um byggða- og atvinnumál
-Stjórnvöldum ber að standa vörð um landsbyggðina-

39. þing Alþýðusambands Norðurlands skorar á stjórnvöld að standa vörð um landsbyggðina, sem er ein af hornsteinum íslensks efnahagslífs.

Fyrir liggur að hinar dreifðu byggðir landsins skapa stóran hluta gjaldeyristekna þjóðarinnar, ekki síst með framleiðslu og útflutningi. Gjaldeyristekjur, sem þannig verða til, standa að mestu undir velferðarkerfi Íslendinga.

39. þing Alþýðusambands Norðurlands krefst þess að eðlilegur hlutur af þeim verðmætum sem landsbyggðin skapar skili sér aftur heim í hérað. Sambandið telur óásættanlegt með öllu að á sama tíma og mikil verðmætasköpun verður til á landsbyggðinni blæði henni út.

Áherslur þingsins eru eftirfarandi:

AN bendir á að heilbrigðisþjónusta á Íslandi á að vera öllum aðgengileg og óháð búsetu. Gera þarf íbúum landsbyggðarinnar betur kleift að sækja heilbrigðisþjónustu í heimabyggð með því að styrkja rekstrargrundvöll heilbrigðisstofnana með öllum tiltækum ráðum.
AN vill jafna aðgengi að heilbrigðisþjónustu óháð búsetu og efnahag með stórauknum framlögum vegna ferða- og dvalarkostnaðar sjúklinga sem þurfa á heilbrigðisþjónustu að halda fjarri heimabyggð. Jafnframt verði komið til móts við aðstandendur sem þurfa að fylgja sjúklingum með þátttöku í kostnaði þeirra. Þá er brýnt að tryggja aðgengilegt húsnæði fyrir sjúklinga og aðstandendur þeirra sem þurfa að dvelja í nánd við heilbrigðisstofnanir af heilsufarslegum ástæðum, fjarri heimabyggð.
AN telur mikilvægt að staðið verði við viðhald og uppbyggingu samgöngu-mannvirkja s.s. vega, flugvalla og annarra samgangna á sjó og á landi. Góðar samgöngur eru forsendur þess að byggð og gott mannlíf þrífist sem víðast um landið.
AN hafnar með öllu áformum stjórnvalda um að selja flugstöðina á Húsavíkurflugvelli til að bjarga fjárlagagatinu. Þess í stað verði staðið við fjárveitingar til venjulegs viðhalds flugvallarins sem skorið hefur verið niður markvist á undanförnum árum. Í dag liggja húseignir á flugvellinum undir miklum skemmdum vegna aðgerðarleysis stjórnvalda.
AN hvetur til þess að aukið fjármagn verði sett til eflingar félagslegrar þjónustu og atvinnuuppbyggingar í hinum dreifðu byggðum landsins.
AN leggur mikið upp úr því að aðgengi fólks að menntun verði jafnað, ekki síst á framhalds- og háskólastigi.
AN vill tryggja aðgengi landsbyggðarinnar að verslun, opinberri þjónustu, fjarskiptum og raforku á viðráðanlegu verði til húshitunar á köldum svæðum sem og til atvinnurekstrar. Kallað er eftir því að allir landsmenn sitji við sama borð hvað auðlindirnar varðar og greiði sambærilegt verð fyrir rafmagn, heitt og kalt vatn sem og aðra orkugjafa.
AN kallar eftir því að hvatar verði innleiddir til að fyrirtæki staðsetji starfsemi, nýsköpun og framleiðslu á landsbyggðinni, t.d. með breytingu á tryggingagjaldi, flutningskostnaði, kílómetragjaldi eða félagslegum tilfærslum eftir svæðum.
AN hvetur til þess að ríkisstofnunum verði fjölgað enn frekar á landsbyggðinni með flutningi frá höfuðborgarsvæðinu út á land.

39. þing Alþýðusambands Norðurlands telur það vera grundvallaratriði að íbúar landsbyggðarinnar njóti sömu lífsgæða og tækifæra og íbúar á höfuðborgarsvæðinu. Jafnvægi í byggðaþróun er forsenda samstöðu og samfélagslegrar sáttar í landinu. Hvað það varðar verða stjórnvöld á hverjum tíma að hafa í huga að almennar skattkerfisbreytingar og álögur mega ekki bitna sérstaklega á íbúum landsbyggðarinnar umfram þá sem búa á höfuðborgarsvæðinu.

39. þing Alþýðusambands Norðurlands minnir á að án sterkrar landsbyggðar veikist bæði efnahagslegt og menningarlegt sjálfstæði þjóðarinnar. Stjórnvöld verða því að tryggja að arðurinn af auðlindum og útflutningi nýtist öllum landsmönnum, ekki síst þeim samfélögum sem skapa verðmætin í byggðalögum víða um land. Við annað verður aldrei unað enda markmið AN að tryggja að áherslur sambandsins nái fram að ganga, þjóðarbúinu og þeim sem byggja Ísland til hagsældar, burt séð frá búsetu og/eða efnahag.

Kallað er eftir byggðastefnu frá stjórnvöldum sem endurspegli áherslur 39. þings Alþýðusambands Norðurlands.

39. þing AN fer fram 24. og 25. september 2026

Wed, 12 Aug 2026 13:31:08 GMT

39. þing AN fer fram 24. og 25. september 2026

Dagana 24. og 25. september 2026 verður 39. þing Alþýðusambands Norðurlands (AN) haldið á Illugastöðum í Fnjóskadal.

Þing AN skal halda annað hvert ár. Fulltrúar á AN þingi eru 100 sem skiptast á milli aðildarfélaga eftir fjölda félagsmanna skv. skýrslu til ASÍ um félagsmenn frá árinu á undan. Öll félög eiga rétt á að senda að lágmarki tvo fulltrúa.

AN þing - 500.000 til Kvennaathvarfs Akureyrar

Mon, 07 Oct 2024 13:18:29 GMT

AN þing - 500.000 til Kvennaathvarfs Akureyrar

Á 38. þingi Alþýðusambands Norðurlands sem fram fór í síðustu viku var samþykkt samhljóða að færa Kvennaathvarfinu á Akureyri kr. 500.000 til starfseminnar.

Hvatning til sveitarfélaga

Sveitarfélögin á Norðurlandi eystra voru um leið hvött til að tryggja samtökunum öruggt húsnæði sem mætir þörfum þeirra. Það á enginn að þurfa að efast um mikilvægi starfsemi kvennaathvarfsins og brýna nauðsyn þess að tryggja aðgengi að þjónustu þess.

Starfssvæði Alþýðusamband Norðurlands er Norðurland og er hlutverk þess að vinna að alhliða hagsmunum aðildarfélaga og félagsmanna þeirra. Aðildafélög Alþýðusambands Norðurlands eru eftirtalin ellefu stéttarfélög:

Aldan, stéttarfélag

Eining-Iðja

Byggiðn, Félag byggingamanna

Félag málmiðnaðarmanna Akureyri

Félag verslunar og skrifstofufólks Akureyri og nágrenni

Framsýn, stéttarfélag

Samstaða

Sjómannafélag Eyjafjarðar

Sjómannafélag Ólafsfjarðar

Verkalýðsfélag Þórshafnar

Þingiðn

38. þing AN - Ályktun um heilbrigðismál

Mon, 07 Oct 2024 13:12:22 GMT

Ályktun um heilbrigðismál

Á 38. þingi Alþýðusambands Norðurlands sem fram fór á Illugastöðum í Fnjóskadal 3. og 4. október 2024 var samþykkt samhljóða eftirfarandi ályktun um heilbrigðismál.

Ályktun um heilbrigðismál

38. þing Alþýðusambands Norðurlands krefst þess að stjórnvöld tryggi jafnt aðgengi að heilbrigðisþjónustu fyrir alla landsmenn, óháð búsetu, aldri eða efnahag. Hver vill ekki hafa aðgengi að lækni og öðru heilbrigðisstarfsfólki í sinni heimabyggð? Öflug heilbrigðisþjónusta eru sjálfsögð mannréttindi.

Stjórnvöld hafa lengi talað fyrir hagræðingu í heilbrigðiskerfinu en þar hafa hljóð og mynd ekki farið saman. Hagræðingartillögur stjórnvalda hafa miðast við að draga úr útgjöldum ríkissjóðs við almenna heilbrigðisþjónustu á kostnað almennings í landinu.

Áhrifin sjást einna best á landsbyggðinni þar sem dregið hefur verið markvisst úr sérfræðiþjónustu og skurðstofum sem og fæðingardeildum lokað og læknaskortur er viðvarandi á svæðum utan höfuðborgarsvæðisins. Afleiðingarnar eru að sjúklingar og aðstandendur þeirra þurfa að ferðast langar vegalengdir, oft við erfiðar aðstæður, með óheyrilegum kostnaði og óþægindum. Þetta á ekki síst við um barnshafandi konur og fjölskyldur þeirra sem í mörgum tilfellum þurfa að flytjast búferlum milli landshluta þar sem sérhæfð fæðingaraðstoð er ekki til staðar nema á fáeinum stöðum á landinu. Slík staða er einfaldlega ekki boðleg.

Hagræðing og aukin samþjöppun heilbrigðisþjónustu á landsbyggðinni má ekki felast í því að kostnaður sé færður yfir á sjúklinga, aðstandendur og stéttarfélög meðan ríkið losar sig undan ábyrgð. Að mati AN kemur ekkert annað til greina en að bæta úr þessari stöðu, enda markmið laga um heilbrigðisþjónustu að allir landsmenn eigi kost á fullkomnustu þjónustu sem á hverjum tíma eru tök á að veita til verndar andlegu, líkamlegu og félagslegu heilbrigði.

Á sama tíma og heilbrigðiskerfið er vanfjármagnað stendur þjóðin frammi fyrir stórum áskorunum í heilbrigðismálum. Lífaldur lengist, lýðheilsuvandamál breytast, vaxandi þörf er á öflugri geðheilbrigðisþjónustu, sálfræðiþjónustu og forvörnum. Þá kallar breytt samsetning íbúa með fjölgun innflytjenda og vaxandi ferðamannastraumur á nýja nálgun í þjónustu. Forgangsraða þarf opinberu fé til að tryggja að heilbrigðiskerfið standi undir þessum áskorunum.

38. þing Alþýðusamband Norðurlands krefst þess að stjórnvöld fylgi eftir markmiðum laga um heilbrigðisþjónustu og bæti þegar í stað aðgengi allra þegna landsins að viðunandi heilbrigðisþjónustu og tryggi þannig jafnan aðgang að heilsugæslu, sérfræðingum, hjúkrunarheimilum og nauðsynlegum lyfjum í heimabyggð. Til dæmis með því að auka verulega rekstrarfé til Sjúkrahússins á Akureyri og annarra heilbrigðis- og hjúkrunarheimila á Norðurlandi. Auk þess verði greiðsluþátttökukerfið endurskoðað, þar með talið kostnaður sjúklinga og aðstandenda, vegna vinnutaps, ferðalaga og dvalar í takt við útgjöld þeirra á hverjum tíma.

Alþýðusamband Norðurlands er reiðubúið til að koma að þessari vinnu með stjórnvöldum, enda um mikilvægt hagsmunamál að ræða fyrir félagsfólk, ekki síst í hinum dreifðu byggðum landsins.

38. þingi AN lokið

Fri, 04 Oct 2024 19:11:28 GMT

38. þingi Alþýðusambands lokið.

82 fulltrúar, frá öllum stéttarfélögum á Norðurlandi sátu 38. þing Alþýðusambands Norðurlands sem fram fór á Illugastöðum í Fnjóskadal 3. og 4. október 2024. Á þinginu var samþykkt ályktun um heilbrigðismál og einnig var samþykkt að færa Kvennaathvarfinu á Akureyri kr. 500.000 til starfseminnar og voru sveitarfélögin á Norðurlandi Eystra um leið hvött til að tryggja samtökunum öruggt húsnæði sem mætir þörfum þeirra. Það á enginn að þurfa að efast um mikilvægi starfsemi kvennaathvarfsins og brýna nauðsyn þess að tryggja aðgengi að þjónustu þess.

Fjölmargir gestir mættu á þingið og voru með fjölbreytt erindi. Gréta Bergrún Jóhannesdóttir, doktor í Félagsfræði við UNAK, var með fyrirlestur sem bar nafnið Slúður sem félagslegt vald og stjórnun. Steinunn Stefánsdóttir, frá Starfsleikni ehf., var með erindið Að setja mörk. Jón Gunnar Þórðarson, frá Bara Tala ehf., var með erindið Íslenska annað tungumál, bara tala. Róbert Farestveit, Sviðsstjóri Hagfræði- og greiningasviðs ASÍ, fór yfir stöðuna í samfélaginu núna haustið 2024. Í lok fyrr dags flutti Finnbjörn Hermannsson, forseti ASÍ, mjög gott erindi um verkalýðshreyfinguna í heild sinni og samspil verkalýðshreyfingarinnar, ríkis og sveitarfélaga.

Ingunn Helga Bjarnadóttir, verkefnastjóri og ráðgjafi hjá SÍMEY, hóf seinni daginn þegar fjallað var um ókeypis námskeið fyrir félagsmenn hjá Símenntunarmiðstöðvunum á svæðinu. Björn Snæbjörnsson, formaður kjaranefndar félags eldri borgara á Íslandi, var næstur í pontu með erindið Er líf eftir vinnumarkaðinn, hvað tekur við? Síðasti erindið á þinginu flutti Atli Einarsson, framkvæmdastjóri Vilko ehf., en það bar nafnið Við viljum Vilko! - landslag matvælaframleiðenda á landsbyggðinni

Áður en kosningar fóru fram var farið yfir og samþykktir ársreikningar AN fyrir árin 2022 og 2023 og fjárhagsáætlun fyrir árin 2024 og 2025.

Ný stjórn AN

Tillaga kjörnefndar um nýja stjórn Alþýðusambands Norðurlands árin 2024-2026 var samþykkt samhljóða.

Ósk Helgadóttir, frá Framsýn, var kjörin nýr formaður AN til næstu tveggja ára. Með henni í stjórn eru Jóhannes Jakobsson, frá Byggiðn, sem er varaformaður stjórnar, og Vigdís Edda Guðbrandsdóttir, frá Samstöðu, sem er ritari stjórnar.

Varamenn í stjórn eru, Aneta Potrykus, frá Verkalýðsfélagi Þórshafnar, Atli Hjartarsson, frá Öldunni stéttarfélagi, og Eydís Bjarnadóttir, frá FVSA.

38. þing AN 3. og 4. október 2024

Wed, 14 Aug 2024 08:35:39 GMT

Dagana 3. og 4. október 2024 verður 38. þing Alþýðusambands Norðurlands (AN) haldið á Illugastöðum í Fnjóskadal.

37. þing Alþýðusambands Norðurlands

Fri, 30 Sep 2022 13:38:08 GMT

77 fulltrúar, frá öllum stéttarfélögum á Norðurlandi sátu 37. þing Alþýðusambands Norðurlands sem fram fór á Illugastöðum í Fnjóskadal 29. og 30. september 2022. Þingið var í fyrsta sinn pappírslaust og tókst það í alla staði mjög vel.

Fjölmargir gestir mættu á þingið og voru með erindi. Helga Þyri Bragadóttir, verkefnastjóri og ráðgjafi hjá VIRK í Eyjafirði, fjallaði um VIRK starfsendurhæfingarsjóð og starfsemi hans. Ellen Jónína Sæmundsdóttir, forstöðumaður Vinnumálastofnunar á Norðurlandi eystra og Austurlandi, fjallaði um Vinnumálastofnun – stöðu og framtíðarsýn. Ágúst Torfi Hauksson, forstjóri Kjarnafæðis Norðlenska ehf., fjallaði um stöðu og framtíð í kjötvinnslu á Íslandi. Björn Traustason, framkvæmdastjóri Bjargs íbúðafélags, sagði frá félaginu og hvað væri á döfinni hjá þeim. Jóna Finndís Jónsdóttir, forstöðumaður réttindasviðs Stapa, fjallaði um lífeyrismál.

Þá sögðu fjórir trúnaðarmenn frá starfi trúnaðarmannsins og viðhorfinu til þess. Þetta voru þær Elsa Hrönn Gray Auðunsdóttir og Sigríður Þórunn Jósepsdóttir, sem eru í Einingu-Iðju, Sirrý Laxdal, sem er í FVSA og Guðmunda Steina Jósefsdóttir, sem er í Framsýn.

Í lok fyrri dags var unnið í hópum þar sem fjallað var um samvinnu og samstarf Alþýðusambands Norðurlands við Orlofsbyggðina á Illugastöðum. Í upphafi vinnunnar fjallaði Trausti Jörundarson, formaður Sjómannafélags Eyjafjarðar, aðeins um samvinnuna og samskiptin. Bergþóra Hrönn Guðjónsdóttir og Guðrún Edda Baldursdóttir, frá ASÍ, stjórnuðu vinnunni sem var með þjóðfundarfyrirkomulagi. Niðurstöður hópavinnu og atkvæðagreiðslu um hana voru kynntar að morgni föstudagsins.

Ný stjórn AN
Anna Júlíusdóttir, frá Einingu-Iðju, var kjörin nýr formaður AN til næstu tveggja ára. Með henni í stjórn eru Aneta Potrykus, frá Verkalýðsfélagi Þórshafnar, sem er varaformaður stjórnar og Atli Hjartarsson, frá Öldunni stéttarfélagi, sem er ritari stjórnar. Varamenn í stjórn eru Vigdís Edda Guðbrandsdóttir, frá Samstöðu, Guðný Grímsdóttir, frá Framsýn, og Trausti Jörundarson, frá Sjómannafélagi Eyjafjarðar.

36. þing Alþýðusambands Norðurlands

Mon, 28 Oct 2019 13:38:08 GMT

74 fulltrúar, frá öllum stéttarfélögum á Norðurlandi sátu 36. þing Alþýðusambands Norðurlands sem fram fór á Illugastöðum í Fnjóskadal 27. og 28. september 2019. Þingið tókst í alla staði mjög vel og var ein ályktun um lífeyrismál samþykkt samhljóða á þinginu.

Fjölmargir gestir mættu á þingið og voru með erindi. Gréta Bergrún Jóhannesdóttir, doktorsnemi við Háskólann á Akureyri, fjallaði um jafnréttisviðhorf og samfélagslegáhrif í minni byggðarlögum. Óðinn Elísson, hrl. hjá Fulltingi, fjallaði um muninn á slysatryggingum skv. kjarasamningi eða skaðatryggingum. Valdimar O. Hermannsson, sveitarstjóri á Blönduósi, fjallaði um gagnaver Borealis Data Center á Blönduósi. Finnur Birgisson, fulltrúi Gráa hersins, ræddi stöðu eldri fólks í þjóðfélaginu og fjallaði um fyrirhugaða málsókn Gráa hersins gegn íslenska ríkinu vegna tekjutenginga/skerðinga í lífeyriskerfinu. Drífa Snædal, forseti ASÍ, fjallaði um verkalýðsmál og leiddi umræðu inn í panel sem formenn stéttarfélaga á þinginu ásamt henni voru í.

Ný stjórn AN

Vigdís Edda Guðbrandsdóttir, frá Samstöðu, var kosin nýr formaður AN. Með henni í stjórn eru Anna Júlíusdóttir, frá Einingu-Iðju, sem er varaformaður stjórnar og Guðný Grímsdóttir, frá Framsýn, sem er ritari stjórnar. Varamenn í stjórn eru Bjarki Tryggvason, frá Öldunni – stéttarfélagi, Svala Sævarsdóttir, frá Verkalýðsfélagi Þórshafnar, og Trausti Jörundarson, frá Sjómannafélagi Eyjafjarðar.

Ályktun um lífeyrismál

36. þing Alþýðusambands Norðurlands krefst þess að samspil lífeyrissjóða launafólks og lífeyris almannatrygginga verði tekið til gagngerrar endurskoðunar. Liður í því gæti verið að hækka almenna frítekjumarkið.

Núverandi fyrirkomulag almannatrygginga gengur allt of langt í að skerða greiðslur úr lífeyrissjóðum og afkoma margra eldri borgara er því enn óviðunandi þrátt fyrir áratuga söfnun lífeyrisréttinda.

Lög um skyldutryggingu lífeyrisréttinda og starfsemi lífeyrissjóða kveða á um að öllum beri að afla sér lífeyrisréttinda með því að greiða ákveðinn hluta launa í lífeyrissjóði. Þegar að lífeyristöku kemur, er sparnaður launafólks notaður til að skerða greiðslur almannatrygginga til lífeyrisþega um hátt í 45% af greiðslunni frá lífeyrissjóðum. Að teknu tilliti til skattgreiðslna, fær lífeyrisþegi með 100.000 kr. á mánuði frá lífeyrissjóðnum um 35% í sinn hlut. Fái viðkomandi 400.000 kr. á mánuði lækkar hlutfallið í 28%.1 Ávinningurinn af sparnaðinum, sem tryggja átti áhyggjulaust ævikvöld, rennur þess í stað að stærstum hluta í ríkissjóð.

36. þing AN lítur svo á að núverandi fyrirkomulag sé komið í ógöngur og krefst þess að dregið verði stórlega úr skerðingum lífeyris almannatrygginga vegna útgreiðslna úr lífeyrissjóðum. Vegna þessa efast launafólk um gagnsemi þess að greiða verulegan hluta launa sinna i lífeyrissjóð til að tryggja framfærslu sína á efri árum.

Þingið telur brýnt að launafólk njóti ávöxtunar af sparnaði sínum í samræmi við upphafleg markmið lífeyrissjóðakerfisins.

1 Skerðingarhlutföll eru fengin með því að bera saman tölur frá reiknivél TR. Miðað er við einstakling sem býr einn.

35. þing Alþýðusambands Norðurlands

Sat, 28 Oct 2017 13:38:08 GMT

Tæplega 90 fulltrúar, frá öllum stéttarfélögum á Norðurlandi sátu 35. þing Alþýðusambands Norðurlands sem fram fór á Illugastöðum í Fnjóskadal dagana 29. og 30. september 2017. Þingið tókst í alla staði mjög vel. Skipað var í fjóra vinnuhópa þar sem fjallað var um vinnumarkaðsmál, menntamál, jafnréttismál og velferðarmál. Fjórar ályktanir voru samþykktar samhljóða á þinginu og má lesa þær hér fyrir neðan.

Fjölmargir gestir mættu á þingið og voru með erindi. Róbert Farestveit, hagfræðingur hjá ASÍ, fjallaði um vinnumarkaðinn í fortíð, nútið og framtíð og um fækkun starfa og menntaþörf. Andri Már Helgason, frá Advania, fjallaði um raunheima tækninnar. Valgeir Magnússon, framkæmdastjóri SÍMEY, fjallaði um mikilvægi menntunar á vinnumarkaði. Halldór Oddsson, lögfræðingur hjá ASÍ, fjallaði um hlutverk og gildi kjarasamninga á breyttum vinnumarkaði. Tryggvi Hallgrímsson, frá Jafnréttisstofu, fjallaði um kvennastörf og karlastörf og velti fyrir sér spurningunni er jafnrétti til staðar á vinnumarkaði í dag. Fjórir ungir Þingeyskir og Eyfirskir þingfulltrúar ræddu um framtíðarsýn ungs fólks til stéttarfélaga. Að lokum flutti Hákon Hákonarson, fyrrum formaður FMA, stutta samantekt um sögu Alþýðusambands Norðurlands, en sambandið varð 70 ára fyrr á árinu.

Nýr formaður AN var kosinn Bóas Jónasson, frá Félagi málmiðnaðarmanna Akureyri. Með honum í stjórn eru Ósk Helgadóttir, frá Framsýn – stéttarfélagi, og Vigdís Þorgeirsdóttir frá Samstöðu. Varamenn í stjórn eru Anna Júlíusdóttir, frá Einingu-Iðju, Sigríður Jóhannesdóttir, frá Verkalýðsfélagi Þórshafnar, og Bjarki Tryggvason, frá Öldunni – stéttarfélagi

Ályktun um jafnréttismál

35.þing Alþýðusambands Norðurlands lýsir áhyggjum yfir hægfara þróun í jafnréttismálum. Alþýðusamband Norðurlands telur brýna þörf á eftirfarandi aðgerðum:

Lögum um jafnlaunavottun í fyrirtækjum verði framfylgt
Störf verði metin til jafns óháð kyni
Markvisst átak verði sett af stað til að stuðla að hugarfarsbreytingu hjá báðum kynjum, m.a. með fræðslu og kynningarefni
Stórtækt átak verði gert í dagvistunarmálum

Ályktun um menntamál

35. þing Alþýðusambands Norðurlands ályktar að allir skuli eiga jafnan rétt til náms. Menntun við hæfi allra skuli vera gjaldfrjáls. Aukið fjármagn verði sett í málaflokkinn. Þing AN telur:

Að koma þurfi í veg fyrir íþyngjandi kostnað við öflun menntunar t.d. vegna búsetu.
Að ákveðnir hópar glími við óviðunandi valkosti í samgöngum og fjarskiptum sem komi í veg fyrir öflun menntunar.
Að auka þurfi fjölbreytni í námsframboði í heimabyggð og leggja aukna áherslu á sköpun og rökhugsun.
Að tryggja þurfi að fólk geti snúið aftur til náms á fullorðinsárum.
Að efla þurfi símenntunarstöðvar og auka möguleika á fjarnámi.
Að greina þurfi menntunar- og færniþörf á vinnumarkaði til framtíðar og að menntun taki mið af því.

Ályktun um vinnumarkaðsmál

Að tryggja stöðugleika er grundvöllur fyrir auknum kaupmætti.
Að taka húsnæðiskostnað út úr neysluvísitölu.
Að sýna samstöðu allra samtaka launafólks í landinu.
Að endurskoða starfsreglur og lög sem gilda um kjararáð.

Ályktun um velferðarmál

35. þing Alþýðusambands Norðurlands lýsir yfir þungum áhyggjum yfir stöðu velferðarmála í fjórðungnum. Aukin fátækt og vaxandi misskipting leiðir af sér slæmt samfélag sem brýtur í bága við grunngildi norræns velferðarsamfélags. Þingið krefst eftirfarandi aðgerða í baráttunni fyrir betri velferð og bættu samfélagi:

Góð heilbrigðisþjónusta á Norðurlandi fyrir alla óháð búsetu og efnahag.
Heilbrigðisþjónusta verði gjaldfrjáls og öllum aðgengileg.
Bæta þarf verulega geðheilbrigðisþjónustu og stuðning við aðstandendur langveikra.
Sveitarfélög í fjórðungnum beiti sér fyrir því að greiða götu almennra leigufélaga sem ekki eru rekin í hagnaðarskyni, til að auka aðgang allra að mannsæmandi íbúðarhúsnæði. Húsnæði er mannréttindi ekki forréttindi!
Tekjutengingar í lífeyriskerfinu verði afnumdar.